இயக்குநர் ராஜ்குமார் பெரியசாமி இயக்கத்தில் தீபாவளிக்கு `அமரன்’ திரைப்படம் வெளியாகியிருந்தது.
சிவகார்த்திகேயன் இத்திரைப்படத்தில் மேஜர் முகுந்த் வரதராஜனாக களமிறங்கி அசத்தியிருந்தார். கமல்ஹாசனின் ராஜ்கமல் ஃபிலிம்ஸ் நிறுவனம் இப்படத்தை தயாரித்ததிருந்தது. இந்த படத்திற்குப் பிறகு இயக்குநர் ராஜ்குமார் பெரியசாமி தனுஷை வைத்து இயக்கப்போகிறார் என்ற தகவலும் ஒருபுறம் பேசப்பட்டு வந்தது. தற்போது இத்திரைப்படத்தின் அதிகாரப்பூர்வ அறிவிப்பும் வெளிவந்திருக்கிறது.
தனுஷின் 55-வது திரைப்படத்தை ராஜ்குமார் பெரியசாமி இயக்குகிறார். ராஜ்குமார் பெரியசாமி `ரங்கூன்’ திரைப்படத்தின் மூலம் இயக்குநாராக அறிமுகமானார். கெளதம் கார்த்திக் நடித்திருந்த இந்தப் படம் கடந்த 2017-ம் ஆண்டு வெளியாகியிருந்தது. 7 வருட இடைவெளிக்குப் பிறகு அவருடைய இரண்டாவது திரைப்படமான `அமரன்’ திரைக்கு வந்திருக்கிறது. இந்த படம் வெளியாகி நல்ல பேச்சுகள் கோலிவுட்டில் கிளம்பியிருக்கும் சூழலிலேயே ராஜ்குமார் பெரியசாமி இயக்கும் அடுத்தப் படத்திற்கான அறிவிப்பையும் வெளியிட்டிருக்கிறார்கள்.
`கோபுரம் ஃபிலிம்ஸ்’ அன்புசெழியன் இந்தப் படத்தை தயாரிக்கிறார். இதுமட்டுமல்ல தனுஷ் இயக்கும் அவருடைய `இட்லி கடை’ திரைப்படமும் அடுத்தாண்டு ஏப்ரல் 10-ம் தேதி வெளியாகும் என இன்று காலை அறிவித்திருந்தனர். இதை தாண்டி `குபேரா’, `தேரே இஷ்க் மேன்’ என்ற இந்தி திரைப்படம், மாரி செல்வராஜ் இயக்கத்தில் ஒரு திரைப்படம், இளையாராஜாவின் பயோபிக் திரைப்படம் போன்ற வலுவான லைன் அப்பை தனது கைவசம் வைத்திருக்கிறார் தனுஷ்.