சின்னத்திரையில் கதாநாயகிகளாக நடிக்கும் பெரும்பாலானவர்களுக்கு குரலாய் இருப்பவர் டப்பிங் ஆர்ட்டிஸ்ட் அக்ஷய பிரபா. ஜீ தமிழில் ஒளிபரப்பாகி மக்களிடையே மிகுந்த வரவேற்பை பெற்ற `சத்யா’ தொடரில் ஆயிஷாவிற்கு டப்பிங் பேசியிருந்தார். அதன் மூலம் ஆயிஷாவும் இவரும் நெருங்கிய நண்பர்களாகவே இருக்கின்றனர். ஆயிஷா அவருக்கு கிடைத்த விருதில் தனது டப்பிங் ஆர்ட்டிஸ்ட்டிற்கும் பங்கு உண்டு எனக் கூறி அக்ஷய பிரபாவை மேடையில் ஏற்றி அழகுபடுத்தியிருந்தார். தற்போதும் அக்ஷய பிரபா பிஸியாக டப்பிங் பேசிக் கொண்டிருக்கிறார்.
இந்நிலையில் அக்ஷய பிரபாவிற்கும் தீபக் என்பவருக்கும் சென்னையில் இன்று இரு வீட்டு பெரியவர்கள், நண்பர்கள் முன்னிலையில் திருமணம் நடைபெற்றிருக்கிறது. வாழ்த்துகள் அக்ஷய பிரபா – தீபக்!
`சுந்தரி’ தொடரின் மூலம் சின்னத்திரைக்குள் என்ட்ரியானார் கேப்ரில்லா. கதாநாயகிக்கு நிறம் தேவையில்லை என நெற்றிப் பொட்டில் அடித்துக் காட்டியவர். மக்களுடைய ஆதரவைப் பெற்ற இந்தத் தொடர் தற்போது நிறைவடைந்திருக்கிறது.
கண்ணீர்மல்க இந்தத் தொடரில் நடித்திருந்த அனைத்து நடிகர்களும் பிரியாவிடை கொடுத்திருக்கின்றனர். இந்நிலையில் கேப்ரில்லா தான் கர்ப்பமாக இருப்பதை தனது ரசிகர்களுக்கு தெரிவித்திருக்கிறார். கேப்ரில்லாவின் பர்சனல் லைஃப் சார்ந்த பல வதந்திகள் சமூகவலைதளப் பக்கங்களில் பரவி வந்தன. அவற்றிற்கெல்லாம் முற்றுப்புள்ளி வைக்கும் வகையில் இந்த சந்தோஷ செய்தியை அறிவித்திருக்கிறார் எனக் குறிப்பிட்டு அவருடைய ரசிகர்கள் பலர் அவருக்கு வாழ்த்துகள் கூறி வருகின்றனர். வாழ்த்துகள் கேபி!
`மிஸ்டர் அண்ட் மிசஸ் சின்னத்திரை’ நடந்து முடிந்திருக்கிறது. இந்த நிகழ்ச்சியின் டைட்டில் பட்டத்தை ஜீ தமிழ் தொடரில் பரிச்சயமான புவியரசும் அவருடைய மனைவி பிரியாவும் தட்டிச் சென்றிருக்கிறார்கள். டைட்டில் பட்டத்துடன் மூன்று லட்சம் காசோலையையும் வென்றிருக்கிறார்கள்.
இரண்டாவது இடத்தை காமெடி நடிகராக பரிச்சயமான கொட்டாச்சியும் அவரது மனைவியும் டப்பிங் ஆர்ட்டிஸ்ட்டுமான அஞ்சலியும் வென்றிருக்கிறார்கள். அவர்களுக்கு இரண்டு லட்சம் ரூபாய் காசோலை பரிசாக கிடைத்திருக்கிறது.