அடுத்த அதிரடி பாய்ச்சலுக்கு ரெடியாகிவிட்டார் சூர்யா. கார்த்திக் சுப்புராஜின் இயக்கத்தில் நடித்திருக்கும் ‘சூர்யா 44’ படத்தின் போஸ்ட் புரொடக்ஷன் வேலைகள் ஒரு பக்கம் பரபரக்கின்றன. இன்னொரு பக்கம், ஆர்.ஜே.பாலாஜி இயக்கத்தில் நடிக்கும் ‘சூர்யா 45’க்கான படப்பூஜை இன்று தொடங்கியிருக்கிறது. பொள்ளாச்சி மாசாணி அம்மன் கோவிலில் இன்று படப்பூஜை நடந்திருக்கிறது.
கார்த்திக் சுப்புராஜ் இயக்கத்தில் நடித்திருக்கும் படம் சூர்யாவின் 44 வது படமாகும். அந்த படத்தில் பூஜா ஹெக்டே, மலையாள நடிகர் ஜோஜூ ஜார்ஜ், ஜெயராம், சுஜித் சங்கர், நாசர், ‘டாணாக்காரன்’ தமிழ் என பலரும் நடித்துள்ளனர். இப்போது பின்னணி இசைக்கான வேலைகள் நடந்து வருகிறது. கார்த்திக் சுப்புராஜின் படப்பிடிப்பு நிறைவு கட்டத்தை நெருங்கும் சமயத்திலேயே ‘சூர்யா 45’ படத்திற்கான கதைகளை கேட்க ஆரம்பித்துவிட்டார் சூர்யா.
அதில் ஆர்.ஜே.பாலாஜி சொன்ன கதை மிகவும் பிடித்துவிட, கதை கேட்டதும், உடனே சம்மதித்து விட்டார் சூர்யா. இந்த கதையில் ரசிகர்கள் சூர்யாவிடம் எதிர்பார்க்கும் அத்தனை விஷயங்களும், சுவாரஸியங்களும் இந்த படத்தில் இருக்கிறது என்கின்றனர். சூர்யாவிடம் இரண்டு மணிநேரம் கதையை சொன்ன கையோடு, இசையமைப்பாளர் ஏ.ஆர்.ரஹ்மானிடமும் கதையை சொல்லி, இசையமைக்க சம்மதமும் வாங்கினார் ஆர்.ஜே.பாலாஜி. ”பயங்கர மாஸாக அடுத்த வருஷம் இது தரப்படும். அதுக்கு நான் உத்தரவாதம்.” என ஆர்.ஜே.பாலாஜி சொல்லியிருக்கிறார்.
‘சூர்யா 45’க்கான படப்பூஜை பொள்ளாச்சி, மாசாணியம்மன் கோவிலில் இன்று நடைபெற்றது. முன்னதாக படத்தின் தயாரிப்பாளரான எஸ்.ஆர்.பிரபு, அனைவரையும் வரவேற்றார். எளிமையான முறையில் நடந்த இந்த படப்பூஜையின் போது, திரண்ட அப்பகுதி மக்களிடம் சூர்யாவும் பேசி மகிழ்ந்தார். படப்பிடிப்பு நாளை முதல் கோவையில் நடைபெறுகிறது. சூர்யா தொடர்பான காட்சிகள் படமாக்கப்படுகின்றன. கதாநாயகியாக த்ரிஷா கமிட் ஆகியிருக்கிறார். இப்போது சிரஞ்சீவியின் ‘விஸ்வம்பரா’ படப்பிடிப்பிற்காக ஜப்பானில் இருக்கும் அவர், விரைவில் சூர்யாவின் படப்பிடிப்பில் பங்கேற்கிறார். கோவை பகுதிகளில் 35 நாட்கள் ஒரே ஷெட்யூலாக நடக்கிறது. அதனை அடுத்து சென்னையில் நடைபெறும் என்கின்றனர். ஆர்.ஜே.பாலாஜி படத்தை முடித்துவிட்டு, வெற்றிமாறன் இயக்கும் ‘வாடிவாசல்’ படத்திற்கு வருவார் சூர்யா என்ற பேச்சு இருக்கிறது.
நீங்கள் விரும்பி படித்த தொடர்கள், இப்போது ஆடியோ வடிவில்… புத்தம் புதிய விகடன் ப்ளே… உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்…
https://bit.ly/UlagaiMaatriyaThalaivargal
