இங்கிலாந்து தொடரில் கே.எல். ராகுலுக்கு ஓய்வு…? – வெளியான தகவல்

புதுடெல்லி,

பட்லர் தலைமையிலான இங்கிலாந்து கிரிக்கெட் அணி இந்தியாவுக்கு சுற்றுப்பயணம் மேற்கொண்டு 5 டி20 மற்றும் 3 ஒருநாள் போட்டிகள் கொண்ட தொடரில் ஆட உள்ளது. இந்த தொடர் வரும் 22ம் தேதி தொடங்குகிறது. இந்த தொடரில் முதலில் டி20 போட்டிகளும், அதனை தொடர்ந்து ஒருநாள் போட்டிகளும் நடைபெற உள்ளன.

டி20 போட்டிகள் முறையே கொல்கத்தா, சென்னை, ராஜ்கோட், புனே, மும்பையிலும், ஒருநாள் போட்டிகள் நாக்பூர், கட்டாக், அகமதாபாத் உள்ளிட்ட நகரங்களில் நடக்கின்றன. இங்கிலாந்துக்கு எதிரான தொடர் மற்றும் சாம்பியன்ஸ் டிராபி தொடருக்கான இந்திய அணிகள் வரும் 12ம் தேதி அறிவிக்கப்படும் என கூறப்படுகிறது.

இந்நிலையில், இங்கிலாந்துக்கு எதிரான தொடரில் முன்னணி பேட்ஸ்மேனான கே.எல்.ராகுலுக்கு ஓய்வு அளிக்கப்பட உள்ளதாக தகவல் வெளியாகி உள்ளது. அதேசமயம் சாம்பியன்ஸ் டிராபி தொடரில் முதன்மை விக்கெட் கீப்பராக ராகுல் தேர்வு செய்யப்படுவார் எனவும் கூறப்படுகிறது.

இதன் காரணமாக இங்கிலாந்துக்கு எதிரான தொடரில் இந்திய அணியில் சஞ்சு சாம்சன் மற்றும் ரிஷப் பண்ட் ஆகியோருக்கு வாய்ப்பளிக்கப்பட்டு, அதில் சிறப்பாக செயல்படுபவரை சாம்பியன்ஸ் கோப்பை தொடருக்கான கூடுதல் விக்கெட் கீப்பராக இந்திய அணி தேர்வு செய்யும் என்றும் தகவல் வெளியாகி உள்ளது.