ICC Champions Trophy 2025: 2025 ஐசிசி சாம்பியன்ஸ் டிராபி வரும் 19ஆம் தேதி தொடங்க உள்ளது. பாகிஸ்தானில் நடைபெறும் இத்தொடரில் இந்தியா, ஆஸ்திரேலியா, இங்கிலாந்து உட்பட 8 அணிகள் விளையாட உள்ளது.
இத்தொடருக்கு முன் அணிகளின் கேப்டன்கள் சந்தித்து கோப்பையுடன் புகைப்படம் எடுக்கும் நிகழ்வும் தொடக்க விழாவும் நடைபெற இருந்தது. இந்த நிலையில், சில காரணங்களால் கேப்டன்கள் சந்திக்கும் நிகழ்வு மற்றும் தொடக்க விழா ரத்து செய்யப்பட்டுள்ளது.
முதலில் இந்திய அணி பாகிஸ்தான் சென்று விளையாட மறுப்பு தெரிவித்தது. இதனால் இந்திய அணி விளையாடும் போட்டிகள் மட்டும் துபாயில் நடைபெறும் என்று தெரிவிக்கப்பட்ட நிலையில், இந்திய அணியின் கேப்டன் ரோகித் சர்மா பாகிஸ்தானில் நடைபெற இருந்த தொடக்க விழாவில் பங்கேற்க மாட்டார் என்ற காரணமும் கூறப்பட்டது. அதேபோல் ஆஸ்திரேலியா மற்றும் இந்திய அணிகள் தாமதமாக வர இருப்பதால் விழா நடத்த வாய்ப்பு குறைவு என்ற கூறப்பட்டது.
மேலும் படிங்க: IND vs ENG | இந்திய அணியின் பிளேயிங் லெவனில் மிகப்பெரிய மாற்றம்..! சஞ்சு இடம் தப்புமா?
சாம்பியன்ஸ் டிராபி தொடக்க விழா ரத்து
இந்த நிலையில், போட்டி தேதிகள் மற்றும் பல்வேறு அணிகளின் பயண திட்டங்களின் காரணமாக தொடக்க விழா மற்றும் அணிகளின் கேப்டன்கள் சந்திக்கும் நிகழ்வு ரத்து செய்யப்பட்டு இருப்பதாக தெரிய வந்துள்ளது.
பொதுவாக, ஐசிசி தொடர் என்றாலே தொடர் ஆரம்பிப்பதற்கு முன் ஒவ்வொரு அணி கேப்டன்களும் சந்திக்கும் மற்றும் பத்திரிக்கையாளர்கள் சந்திக்கும் நிகழ்வு நடைபெறும்.
ஆனால் சாம்பியன்ஸ் டிராபி தொடர் பாகிஸ்தானில் நடைபெறுவதால் இந்திய அணி விளையாடும் போட்டிகள் துபாயில் நடைபெறுகிறது. தொடரின் முதல் போட்டியில் (பிப்.19) பாகிஸ்தான் மற்றும் நியூசிலாந்து அணிகள் மோத உள்ளன. இப்போட்டி பாகிஸ்தான் கராச்சி மைதானத்தில் நடைபெறும்.
தொடர்ந்து இரண்டாவது போட்டியில் (பிப்.20) இந்தியா – வங்கதேச அணிகள் மோதுகின்றன. இப்போட்டி துபாயில் நடைபெறும். எனவே கேப்டன்கள் சந்திப்பு மற்றும் தொடக்க விழா தொடர் தொடங்கும் முந்தைய நாள் (பிப்.18) அன்று திட்டமிட்டால், இரண்டு நாட்களில் துபாயில் நடைபெறும் போட்டிக்கு இந்திய அணியின் கேப்டனும், வங்கதேச அணியின் கேப்டனும் அவசர அவசரமாக கிளம்பிச் செல்ல வேண்டி இருக்கும்.
அதேபோல் பாகிஸ்தானில் உள்ள மூன்று மைதானங்களின் கட்டுமான பணிகள் நடைபெற்று வருகின்றன. இப்படி பல சிக்கல்கள் இருப்பதால் சர்வதேச கிரிக்கெட் கவுன்சில் (ஐசிசி) தொடக்க விழா மற்றும் கேப்டன்கள் சந்திப்பு நிகழ்வுகளை ரத்து செய்ய முடிவு செய்துள்ளது.
மேலும் படிங்க: சாம்பியன்ஸ் டிராபி 2025 தொடக்க விழா முக்கிய அப்டேட்… ரோகித் சர்மா கலந்து கொள்வாரா?