கொழும்பு,
ஆஸ்திரேலிய கிரிக்கெட் அணி இலங்கைக்கு சுற்றுப்பயணம் மேற்கொண்டு 2 டெஸ்ட் மற்றும் 2 ஒருநாள் போட்டிகள் கொண்ட தொடரில் ஆடி வருகிறது. இதில் முதலில் நடைபெற்ற டெஸ்ட் தொடரை 2-0 என்ற கணக்கில் ஆஸ்திரேலியா கைப்பற்றியது. இதையடுத்து இவ்விரு அணிகள் இடையிலான ஒருநாள் தொடர் நாளை தொடங்குகிறது.
இலங்கைக்கு எதிரான ஒருநாள் தொடருக்கான ஆஸ்திரேலிய அணி அறிவிக்கப்பட்டாலும், அந்த அணிக்கு யார் கேப்டனாக செயல்படுவார் என்பது அறிவிக்கப்படாமல் இருந்தது. இந்நிலையில், இலங்கைக்கு எதிரான ஒருநாள் தொடரில் ஆஸ்திரேலியாவின் கேப்டனாக முன்னணி வீரர் ஸ்டீவ் ஸ்மித் செயல்படுவார் என தகவல் வெளியாகி உள்ளது.
அதாவது, இருதரப்பு தொடர் தொடங்குவதற்கு முன்னர் இரு அணி கேப்டன்களும் அந்த தொடரில் வெற்றி பெறும் அணிக்கு வழங்கப்படும் கோப்பையுடன் புகைப்படம் எடுத்து கொள்வர். அதேபோல், இலங்கை-ஆஸ்திரேலியா அணிகளுக்கு இடையிலான ஒருநாள் தொடருக்கு இரு அணி கேப்டன்களும் புகைப்படம் எடுத்தனர். அப்போது ஆஸ்திரேலியா தரப்பில் ஸ்டீவ் ஸ்மித் புகைப்படம் எடுத்தார்.
இதன்படி பார்த்தால் இலங்கைக்கு எதிரான ஒருநாள் தொடருக்கான ஆஸ்திரேலிய கேப்டனாக ஸ்டீவ் ஸ்மித் செயல்படுவார் என தெரிகிறது. இந்த அணிக்கு டிராவிஸ் ஹெட் துணை கேப்டனாக செயல்படுவார் எனவும் கூறப்படுகிறது.