சூப்பர் ஸ்டாரின் ‘கூலி’ படப்பிடிப்பு நிறைவடைந்திருக்கிறது. அடுத்து போஸ்ட் புரொடக்ஷன் பணிகள் அனல் வீச ஆரம்பித்திருக்கிறது. ‘கூலி’யின் அடுத்த மூவ் என்ன என்பது குறித்து விசாரித்ததில் கிடைத்தவை இவை.
மல்டி ஸ்டார்களின் கூட்டணியில் உருவாகி வரும் ‘கூலி’யில் ரஜினியுடன், அமீர்கான், சத்யராஜ், நாகார்ஜூனா, உபேந்திரா, ஸ்ருதிஹாசன், ரெபா மோனிகா ஜான், ஷோபின் ஷாகீர் எனப் பலரும் நடித்துள்ளனர். ஒரு பாடலுக்கு பூஹா ஹெக்டே நடனம் ஆடுகிறார். படத்தில் ரஜினியின் கதாபாத்திரத்தின் பெயர் தேவா, அதைப்போல சைமன் ஆக நாகார்ஜுனா, காளீஷாவாக உபேந்திரா, ராஜசேகராக சத்யராஜ், ப்ரீத்தியாக ஸ்ருதி ஹாசன், தயால் ஆக சோபின் ஷாஹிர் ஆகியோரின் கதாபாத்திரங்களின் தோற்றங்களும் பெயர்களும் வெளியாகின. சமீபத்தில் லோகேஷின் பிறந்தநாளின்போது அமீர்கானுடன் சேர்ந்திருக்கும் புகைப்படம் ஒன்றையும் வெளியிட்டு, அமீர்கானும் படத்தில் இருக்கிறார் என்பதை உறுதி செய்திருக்கிறார்கள். அன்று தான் லோகேஷுக்கும் அமீர்கானுக்கும் பிறந்த நாள் என்பது அறிந்ததே!
அமீர்கானுக்கு இதில் ரொம்பவே வலுவான ரோல். ரஜினியின் படத்தில் கெஸ்ட் ரோலில் நடிக்க கேட்டதும், மகிழ்ச்சியுடன் வந்து நடித்து கொடுத்திருக்கிறார் அமீர்கான். அவரது போர்ஷன்கள் எண்ணூர் துறைமுகம் பகுதிகளிலும், ராஜஸ்தானிலும் படமாக்கியுள்ளனர். கடந்த வாரத்திலேயே படப்பிடிப்பு நிறைவடைந்துவிட்டாலும் இப்போதுதான் அதிகாரப்பூர்வமாக அறிவித்துள்ளனர். இந்த கடைசி ஷெட்யூலில் ஷோபின் ஷாஹிர், ஸ்ருதிஹாசன் காம்பினேஷனில் காட்சிகள் படமாக்கப்பட்டுள்ளது. ‘விக்ரம்’ படத்தில் ‘ரோலக்ஸ்’ ஆக சூர்யா கலக்கியதுபோல, அமீர் கான் அசத்தலான மொமன்ட்டில் வந்து கலக்க உள்ளார். அதற்காக அவரது தோற்றத்தை சஸ்பென்ஸாக வைத்துள்ளனர்.
போஸ்ட் புரொடக்ஷன் வேலைகளைத் தொடங்கிவிட்டனர். பூஜா ஹெக்டே ஆடும் முதல் சிங்கிளை கொண்டு வரத் திட்டமிட்டுள்ளனர். படத்தின் ரிலீஸ் தீபாவளி என்றும், ஆகஸ்ட் 15 என்றும் பல தகவல்கள் சுற்றினாலும், ஆகஸ்ட்டில் ரிலீஸ் உறுதி எதிர்பார்க்கலாம் என்ற பேச்சு இருக்கிறது. காரணம். ஆகஸ்ட் 15 என்பது இந்தியாவிற்கு மட்டுமல்ல, சூப்பர் ஸ்டாருக்கும் முக்கியமான ஒரு நாள். அன்று தான் அவர் அறிமுகமான ‘அபூர்வ ராகங்கள்’ வெளியானது. அன்றைய தினம் ‘கூலி’ வெளியானால் ரஜினி 50 கொண்டாடும் விதமாகவும் அமைந்துவிடும் என்கின்றனர். ரஜினியின் ‘ஜெயிலர்’ படமும் 2023ல் ஆகஸ்ட் 10ம் தேதி அன்று தான் வெளியானது. அவருக்கு ராசியான மாதமாக இருப்பதால், ‘கூலி’யை ஆகஸ்ட்டில் எதிர்பார்க்கலாம் என்ற பேச்சு பலமாக இருக்கிறது.
சினிமா விகடனின் பிரத்யேக Whatsapp க்ரூப்
https://chat.whatsapp.com/KzgH8aPb2MI9PVttY53JpX
சினிமா தொடர்பான எக்ஸ்க்ளூசிவ் அப்டேட், அசத்தல் பேட்டிகள், டி.வி அப்டேட்கள் என எதையும் மிஸ் செய்யாமல் தெரிந்து கொள்ள…
உங்கள் வாட்ஸ் அப் மூலமே இணைந்திருங்கள் சினிமா விகடனுடன்…